Revelation of John 14
Kei koa Suval Sili Sipsip ka Meatin Keil Onen Amulomal en Vatihou Saeon
1Evus nalele, ka nales kei koa suval sili sipsip mul mulomal en Vatihou Saeon. Ka meatin onen koa avi taosen handred tai hanumau elu ka ehat (144,000) amulomal ral mini. Koakeil enek akur kat metai en veinae koa isen kei koa suval sili sipsip ka isen Tamen amutisi ien. 2Ka naraengon rea tai ka en out nesa koa musel keih suval navong mari tahi muti rum en ahat keil, vuo suval navong voulul muroh. Verien teni suval navong meatin keil apilei en string keil ten harp one. 3Meatin koa avi taosen heite handred tai hanumau elu ka ehat (144,000) enek amulomal en meten koakeil amul en out nesa, en meten tai koa mul en mari vulin ten keihoen, en meten tounah keil ehat (4) koa amoul, ka en meten elda keil emun. Navong amulomal mukok, amul amusau en souen hau tai koa onen koakeil Ahi kulat keil ran out netan, koakeil enges koa avi handred tai hanumau elu ka ehat (144,000) enek akilea avasauni. 4Koakeil enek, arpuruntei keil vatal min etai ahin. Anatin, keil amumon rendemien one keke avousil kat Ahi enges ka irrotei hetal min etai ahin. Amusil kat kei koa suval sili sipsip en out vasi koa kei mul va en. ▼ Avul lat keil ran meatin sav keil ten out netan ral min ran Iesu keke imai ilomal en meten Ahi ka en meten kei koa suval sili sipsip keke imai isuval moei sanien votut heha min keilu. 5En moulien vasi one, arluvostei meatin ka sakien keil one mutolas.Angelo Etel Telsan Selkatien Va Min Meatin Keil Ten Out Netan
6Evus, nales angelo tamun muka nesa en mesaiuai. Kei kur kat more longlongien koa ten lisenges vahitehiteni min meatin savsav vasi keil ten out netan: koakeil ten vatiamal vasi keil, koakeil ten selusien vasi keil, koakeil ten kantri vasi keil, ka min vati meatin savsav keil emun. 7Kei selus en rea takeih tai vit, “!Mihouhou min Ahi ka mihekul anatin en hetetamenien onen! Ven avong emai keke kei valing hakot en meatin vasi keil. !Miheha netan min kei koa mumon teilang nesa, out netan, atas ka vulioai keil!”8Katau en koanek, angelo koa elu eni muka ka vit, “!Taon tatisa merangli koa avise en Babilon ven hetetamenien onen! Ahi san mahien ten vurohien min meatin teni veni asakin meatin ten kantri vasi keil alokovein sakien tetahos keil ka amusil sakien tatisa keil suval hoeaso tai san uaen min meatin keke voum vatisa vatal mini!”
9Katau en koanek, angelo koa etel en keitel muka musil koa keilu lumulamu. Kei viteni en rea takeih tai vit, “Kami koa miva netan min tirendan koa mulamu ka min nana onen, ka mikur metai onen mul en veinami vuo en hemi, 10kami varei mihekur mahien ten vurohien onen Ahi koa hekeih vis hekeih imok. !Ahi heson kami miheha en ahang takeih keke mihelong mahien tatisa en meten angelo votut keil ka en meten kei koa suval sili sipsip. 11Kami koa miva netan min tirendan ka nana onen, ka koa mikur metai ten isen, tupas ten mahien onami hehina nesa lises ka lisenges, mahien onami sakras vavus.”
12Sakini, meatin votut keil onen Ahi koa along kat mengkatien onen ka amusil kat Iesu, tahos ilomal hekeih en demkatien one.
13Evus, naraengon rea tai ka en out nesa koa vit, “Kitis selusien koanik: Kosa heha, tokolkatien hel ven koakeil imatmat ven demkatien one en Asuv Iesu!”
Ninin vit kesi vit, “!Anatin eli! Keil iseh revi ran umen takeih one, keil ikur uite ten sakien tetahos keil koa amumoni.”
Avong Tasuhutien En Out Netan
14Evus, nalele ka nales mahmah tai koa muoh. Ka meatin tai mul rondan ien koa alesi suval Natin Meatin. En vatin, vatluvoluv mul koa vi gol, ka vuli kat huknaef tai koa kan mul en hen. 15Evus, angelo tamun kistal ran Eim Votut ka visohiso keih va min kei koa rondan en mahmah vit, “Kikur kat huknaef onom ka kum hetal mini, veni kosa vi avong tasuhut en meatin vasi keil ten out netan keke avaling hakot en keil. !Anatin, tounah keil en out netan men keke avasuhut eni!” 16Evus, kei koa rondan en mahmah sein huknaef onen en out netan, ka kei musuhut tounah vasi koa mul ien.17Evus, nales angelo tamun kistal ran Eim Votut en out nesa, ka kei mun vuli kat huknaef tai koa kan. 18Evus, angelo tamun, koa lei kat ahang lu ten ahor ten sanien ka ven avet enek. Kei viso keih vina ven angelo koa vuli kat huknaef koa kan vit, “!Kikur kat huknaef onom ka kitei lat meatin keil ten out netan veni asuval hei grep keil koa men tuai en nei grep keil!” 19Sakini, angelo sein huknaef onen en out netan, rei hei grep keil ran vatte. Evus, so ruain keil uva en out koa ave lin site rani koa vi out ten mari vurohien onen Ahi. 20Hei grep keil enek, ave lin site rani en out hae ten taon ten out Serusalem, ka ara teni mue rani suval oaisal koa taveah teni rokol kilomita handred etel (300 km) ka anev teni vesesal rokol mita elu (2).
Copyright information for
PMA